حدوتة مصرية...................حدوتة مصرية

2011-09-30T21:00:00.000-07:00

وثقت فيك وسلمتلك دقنى وكنت فاكرك يومها جى تلحقنى
حطيت ايدك فى جيبى وقلت ماشى حبيبى وعمره مايسرقنى
وكل ماافكر فى حاجه اقولها علطول لسانك بيسبقنى
وعدت شهور وايام وكل اللى خدته كلام فى كلام
صدقت كل كلامك لكن عمايلك خايبه مابتصدقنى
نسيتنى حتى طريقى مش عارف قابلتك فين
مش كنت انت دليلى ليه عايز تتوهنى سنين ولا قاصد تغرقنى
عملتنى جانى وانت استلمتنى مجنى
وعمال تلففنى فى الساقيه وتقولى بكره تجنى
لامتى هتفضل تحير فيا وتخنقنى
ايه اللى ناوى عليه خلص وهاته يابيه
قصدك تمط وتطول عشان انساه قصدك تتوهه فى الزحام منى
نفسك تدوخنى فى الساقيه واقول انا اْاه
علشان تسيب الحرامى اللى شيلته معاه وتطلعه من تانى بطل والسجون كرهاه

وترد الامانه فى الاخر وتشنقنى

قَالُوا أَخْرِجُوهُمْ مِنْ قَرْيَتِكُمْ إِنَّهُمْ أُنَاسٌ يَتَطَهَّرُونَ (الاعراف)82)

2011-07-22T21:13:00.000-07:00

سنه30مرت من عمر مصر امرضتها وافقرتها حينما يحكم رجل قوما 30 سنه لابد ان يترك عليهم صفاته فهناك ثلاثة اجيال ولدت فى عصر حكم هذا الرجل وحين ندرس تاريخ الشعوب والامم نجد ان من الصعب جدا ان ينهض شخص باْمه لكن مااْسهل ان يحطم حاكما اْمة باْكملها ان قدر مصراو اختباره لايمان شعبها او ابتلاءه لهم او عقابه لهم يعلم الله- ان يحكمها رجل بهذه الضحاله الفكريه وهذه التفاهه الشخصيه المصحوبه بجنون العظمه وحب الذات والتصلت والبطش ان يحكمك دكتاتورا ناعما يضحك لك فى الصباح امام الكاميرات ويبطش وراء الستار قد تستطيع الشعوب ان تحتفظ بموروثاتها رغم هذا المسخ من الحكام المسلط على رقبتها عقودا فعادات وتدين وعرف الشعوب يكون حصنا منيعا لاينهار بسهوله اما م هذا الفساد اما ماحدث فى مصر فكان شاْنا مختلفا عن كل ذلك فقد حدث عبث بمقدرات هذا البلد اريد به ان تسقط هذه الدوله من استرتيجيات المنطقه ويتقزم دورها العربى والافريقى الرائد والموجه فكان ما وقعت به مصر ممنهجا ومخططا ولم تنجلى بعد كل تفاصيله اننا راْينا اشاراته ولمسنا هيكله وتشممنا رائحته فقط وحين يشهد احد رجال وزارة الخارجيه الافاضل وهو الدكتور عبدالله الاشعل مرشح رئاسة الجمهوريه- يشهد باْن مبارك كان عميلا لاسرائيل وهذا يدعونا للربط بين مقتل السادات بعد ابرام اتفاقية كامب ديفيد وبداية مرحلة التنازلات والعطايا لاسرائيل ولنتصفح تاريخ الحكم المباركى فنتذكر مقتل المجند سليمان خاطر مشنوقا فى السجن الحربى بعد مطالبات اسرائيليه بتسلمه لقتله اسرائيليين اهانوا العلم المصرى على الحدود وكانت اول قضيه فى هذا الاتجاه ثم بعدها محاكمة محمود نور الدين وخالدعبدالناصر بتهمة معاداة اسرائيل وتوالت مواقف مبارك المحطه لشاْن ومكانة مصر ثم معاونة امريكا فى ضرب العراق باسم تحرير الكويت ثم حصاره بعدها 10سنوات ثم الجهود المخابراتيه لنظام مبارك للتعاون مع الامريكان والصهاينه وضرب كل حركات المقاومه العربيه ضد اسرائيل بداية من عزل ياسر عرفات والتنكيل به اعقاب حرب الكويت ثم اجباره على مسار المفاوضات واوسلو ثم معاداة ايران وحزب الله وحركة حماس واصبح النظام المصرى نظاما حبيبا لامريكا عاشقا لاسرائيل فنسلمهم الجاسوس عزام وبعد ايام يقتلون ثلاث مجندين امن مركزى على حدود رفح بدبابه اسرائيليه ان هذا التاريخ الاسود على المحيط العربى جعل الاسم المصرى مكروها والانسان المصرى منبوذا فى المجتمعات العربيه لاْن الحكومه المصريه كانت تعقد الصفقات مع تلك الدول على حساب كرامة مصر ومواطنيها بينما تضخ دولارات فى حسابات مبارك واْله فى البنوك الاوروبيه كل هذ العفش السياسى الخارجى كان مصحوبا بانكسار داخلى فشعور المواطن بضياع هيبة دولته وتقزيمها انعكس على سلوكه فى عمله فانتشرت الرشى والفساد والموالسه واصبحت المناصب بالعلاقات والواسطه والرشوة وتملق ترتفع وانطفاْقول الحق شيئا فشيئا حتى لاينكل بصاحبه وانتشرت الامثله فى الجانبين من فسد يعلو ومن عف يذل ودخل رجال اعمال تضخمت ثروتهم واذداد نفوذهم بداْالجزء التالت فى هرم الفساد وهو ذروة الفساد اصبح كل شىء يباع ويستباح بالمال والبلطجهواى رجل اعمال له جانب سياسى وجانب امنى مع البلطجيه والشرطه مع تزامن انحطاط المستوى الاخلاقى بالمجتمع لان نظام مبارك عمد الى منهج لترسيخ حكمه وهو تدعيم خارجى فكان يرضى امريكا واسرائيل بكل طريق واخرها الكويز وصفقة الغاز على اعتبار انهم يضمنون بقاؤه وياْمن مخابراتهم والطريق الثانى ابعاد دور الشعب فى الحياة فيجعل الشعب مثل حيوانات محبوسه داخل اطار محكم يملك مفاتيحه وحقق هذا باْكثر من منهج1- افساد صحة الشعب بامراض عدة تستنزف وقت ومال افراد الشعب مثل الفشل الكلوى والكبدى والسرطان وكم اثيرت قضايا تتهم بعض الوزراء صراحة بذلك مثل يوسف والى وكان يخضع لحماية مبارك 2-تغييب عقل الانسان المصرى باْكثر من منهج اولا افساد التعليم بكل اشكاله وجعل العمليه التعليميه سمك لبن تمر هندى وانشاء مدارس وجامعات خاصه ومفتوحه تشترى بالمال فاصبح بالدوله خريجين بالالاف لايفقهون شيئا فمحامون لا يفقهون بالقانون ولكن يتقنون الاساليب الملتويه لجلب المال واطباء مستهترين والاف من قضايا الفساد بالمستشفيات- مع وجود استثناءات بكل مجال- ومهندسين ومعلمين وحتى حرفيين وتحول المجتمع الى طبقات غير منتهية الطموح فمن يكسب الفا لا يقنع ومن يكسب مليون لايكتفى ومن معاه مليار لاياْمن فاصبح الشعب يصارع بعضه على لقمة العيش فى غابه ارادتها الدوله ولانغفل ان نظام مبارك جعل تزاوجا بين الشرطه وتجار المخدرات فالشرطه تعرفهم جيد وتمسك ببعضهم لعمل قضايا سنويه يتم اثباتها بمكتب المكافحه ويضبطون بضاعه ويمررون عشرة وكان اشهرها فيديو خالد سعيد الذى تسبب بقتله وكاْن هذا كان سياسة دوله لاسياسة شرطه ليظل الشعب غائبا عن الوعى 3- محى مبارك ثقافة الدوله واصبح فنها مبتزل فاصبح للراقصات شاْن كبير وللعرى حظ وفير من الشهرة والمال الهاء الشعب بمئات المحطات الفضائيه وكرة القدم اللتى كانت حفلا يتصدره مبارك وابناؤه ليظهروا بانتصارات زائفه امام الشعب لو سردنا مفاسد هذا العصر لن تكفى اوراق الدنيا كلها لكن حين نصر الله شباب هذه البلد بدماء من خرجوا يوم 25يناير وخرج هؤلاء الشباب بصدورهم متوقعين البطش والموت ويحلمون اما بالحريه والكرامه واما الجنه والهرب من نار مبارك وحكمه الذى سئمناه وجعل شباب مصر يهرب فى البحر المتوسط منتحرا خرج الشباب ولم يكن احد يتوقع ولم يكن احد ليجرؤ على ترديد مارددوه ان الشعب يريد اسقاط النظام وسقط اسم مبارك من فوق حكم مصر لكن لاتزال ايادى مبارك اللتى عبثت بمصر ومقدراتها وعقولها تتحرك فى نفس المناطق اللتى افسدتها وجعلتها منومة مغناطيسيا الى فسادها ولا يكاد الفاسدون من اتباع مبارك يجدون الفرصه حتى ينقضوا على الثورة وضربها بمقتل فيحاولون تزييف الاخبار المغلوطه عن الثوار ومن دواعى السخريه ان الشعب الذى ايد بالامس ابطال التحرير يردد بعضه هذه الاكاذيب ويصدقها فهل يوئد الشعب ثورته بيده ام هل تكون هذه السهام الموهه اللى الثورة والثوار بمثابة اشارة توقظ الاسد النائم هل سيهب الشعب ليقول ان من فى التحرير ماهم الا وكلاء عن كل ميادين ونجوع وقرى مصرى لولا شظف العيش لكانوا معهم ام يتركون ضباع مبارك تلتف حول الثوار وتنفرد بهم فصيلا بعد فصيل وجماعه بعد جماعه هل يحمى المصريين ثورتهم ويثبتون انهم شعب جدير ان يحكمه اطهار واشراف وانه لايستحق حكامه الفاسدين ام ان الفساد الذى استوطن مصر ونهش من لحمها سنينا اصبح من الصعب ان يستاْصل فاصبح يجرى من الشعب مجرى الدم فاصبح على الشعب ان يتخلص من ثواره لكى ينام ثانية وينسى دواعى الشرف والكرامه والحريه تلك العبارات اللتى كان قد نسيها قبل 25يناير ولما نجحت الثورة ايدها الشعب لكنها الان تمرض ولا تستطيع ان تكمل طريقها فاءما ان يمدها الشعب بمدده ويعطيها قبلة الحياة واما فليهناْالفاسدون ونخرج ثوار يناير من هذه البلد لاْنهم لن يقبلوا ان يعيشوا ثانية فى عصر نجس بعد ان لمسوا الطهارة والنقاء وراْوا الشهادة فى الميدان

الثورة المضادة

2011-07-10T20:31:00.000-07:00

ياللى رميت فى ارضى بزور الشر

كل مااقلع فى جدر القى الف جدر بيطرح

كتر فسادك فى الفضا وف البر

وشايفه فى كل ايد نضيفه بيسرح

تنزف الايد الشريفه الدم يجرى بعروقها السم

تداوى جرح تلاقى الشر لسه فيه بيجرح

لامتى يابلدى هتصبحى بالهم وتنامى على الهم

لا مكتوب لماضيكى ولا لطفلك فى يوم يفرح

ده كاْنه اخطبوط وفارد طروفه عالبلد مظبوط

وكاْنه سحر وعمى الناس والشعب بيه مربوط

فى كل شارع وفى كل حارة فى كل هيئه ووزارة

فساد فساد على العباد ولا ساب تجارة ولا جزارة

وكاْنه داء وانتشر وعدى كل البشر باءشارة

لكن يامصر لا مايموت فيكى الحق

ولا تبقى تانى للفساد مسرح

ولا اى ظالم يبقاله مابينا مطرح

ابن ثـائـــــر

2011-07-09T16:50:00.000-07:00

بحبك يامصر بحبك للابد ومايعلى على حبك غير الواحد الاحد
اتولدت لقيت تاريخك مالى كل الكتب.. واول نفس فى صدرى كان حبك فيه لبد
حبيتك مش بخاطرى ولا امر كان باْمرى ..لانى طلعت مصرى من اول مااتوجد
اسمى مربوط باسمك وشكلى ملامحه رسمك وكاْن عشانه قمحك اول مااتحصد
انا حبيتك يامصر
قسيت منك كتير بس انا مهما اقاسى بصبح للظلم ناسى
ممكن الام تقسى وبحضن فى لحظه واحده لازم الابن ينسى
اناابنك يابلدى اللى جاى يحمى ضهرك .. مضحى وجاى بروحى عشان اقدمها مهرك

كفاياكى بقى قسيه لامتى تضنى عليا ان نفسى اموت فداكى ليه تموتينى بقهرك

ماتشوفى اللى خدعوكى وللاعداء باعوكى باعوا بترولك ونيلك غازك وقلعوا نخيلك

غرسوا الاشواك فى ارضك وتاجروا بتاريخك وعرضك وقطفوا حتى زهرك

مفروض هما ولادك شاربين منك وبيكى
طب ليه خانوا وهانوا وماخافوش ليه عليكى

مش كانوا دوول رجالك اللى ناعمين بمالك ليه شوهوا جمالك ليه حراميكى حاميكى
طب ليه حاضنه اللى بايع ومسلماه الودايع وسايبه ليه اللى جايع مع انه كان شاريكى
كان ابنك اللى شارى بيشرب من المجارى والمرض جواه سارى بيهريه عقل وجسد

وبرضوا بحبك يامصر وبحبك للابد
وهفضل احبك يامصر الى ابعد امد
هحبك غصب عنك لانى حته منك
هيفضل يعصرنى اْلمك واتدفى تحت علمك

وارسم جوايا املك واحلم اخضر فى رملك
واتشرف بصورة جنودك وهما بيحموا فى حدودك
وتعيشى فى عزة ونصر
وهعيش فى حبك يامصر وهموت فى حبك يامصر

زيارة الى الرئيس

2009-03-25T20:49:00.000-07:00

ساْلنى صديق ماذا لو وجدت نفسك امام رئيس الجمهوريه ماذا ستقول له فاْجبته انى

هقوله: انا من 28 سنه ونفسى اقابلك ياريس انا اولا عايز اشكرك انك قدرت تحكمنا السنين دى ده الريس السادات قعد 11سنه وكانوا كلهم وجع دماغ والريس عبد الناصر قعد 18سنه وشعره شاب وجتله جلطه ياولداه احنا شعب مقرف ومابيعجبوش العجب لا عجبنا الفراعنه ولا الرومان ولا اتمسكنا بالحكم الاسلامى ولا الاتراك نفعوا معانا ولا حتى الانجليز كله كان بيشرب قهوته ويتمشى على بلده . انت بطل ياريس بطل مش عشان الضربه الجويه بس لكن عشان استمريت معانا العمر ده ايه اللى يجبرك تحكم شعب نصه او اكتر جاهل وغلبان ومايفكرش فى حاجه غير يجيب غداه والفقر مكسر ضلوعه والامراض بتنهش فيه ده شعب همه على بطنه وكمان مش عاجبه ولا هما فاهمين يعنى ايه تنميه وخطه عشريه ولا فاهمين يعنى ايه استثمار ولا سياحه وحاجه تكسف انا عرفت سيادتك بتحب تقابل البهوات الكبار اللى بييجوا يزوروك فى شرم الشيخ ليه اكيد عشان مكسوف احسن الناس بتاعتنا دى تعرك وتفضحك فى وسط ضيوفك اتاريك ياعينى كل شويه تسافر وتتعب نفسك رايح جاى على شرم طب يعنى احنا لو ناس مؤدبين وبنفهم وهاديين ونضاف مش كان زمان سيادتك قابلت ضيوفك وسطينا بدل الهده دى بس احنا كده شعب متعب ويحب يدوخ نفسه انا تفسى ياريس اقول لسيادتك حاجه مهمه اوى انا عارف ان مستحيل اخبار بلد سكانها80مليون هتوصلك كلها امال انت معين وزرا ومحافظين ليه مش عشان يشتغلوا بس والله ياريس ماحد منهم بيشتغل خالص وهما عارفين ان مشاغلك كتير ومش هتدور وراهم ومستغليين الموقف وطاحنين الشعب بيقولولك ياريس ان الفرد دخله 40 ل 60 ج فى اليوم وهو دخله 10 ل20 للمتوسط شوف انت ياريس بقى نعيش ازاى ؟انا معاك مش لازم ناكل لحمه والله مابندوقها لكن لو كلنا وجبتين عيش وطعميه ود فعنا الكهربا .... انا معاك ممكن ماننورش نور كتير بس عالقليله نشوف الاخبار فى التلفزيون عشان حتى نشووف سيادتك امال هتخطب لمين احنا بنحبك ياريس عشان متاكدين انك بتحبنا اكيد طالما متمسك بينا العمر ده ومش هاين عليك تسيبنا رغم اللى بنسببه ليك من وجع دماغ وقلة راحه لكن طاللما انت معانا يبقى بتحبنا وسيبك من اى كلام تانى بس ارجوك ياريس حبك لوحده مش كفايه

ناصر الحاضر الغائب الجزء الاْول

2008-01-16T18:47:00.000-08:00

اهداء الى كل عشاق مصر والعروبه تخليدا لذكرى الزعيم جمال عبد الناصر فى ذكرى ميلاده التسعين وهذا الفيلم تخيلى واعتزر عن بعض التباين فى الصوت لكن الفيلم ليس احترافيا فارجو المعزرة لاْ نى اهتميت بالفكرة

الجزء الاول

نهيبة 4 الاف سنه.. عايشه ازاى؟؟؟؟؟ عظيمه يا مصر

2007-07-15T18:12:00.000-07:00

نهيبة 4 الاف سنه.. عايشه ازاى؟؟؟؟؟ عظيمه يا مصر
-----------------------------------------------------
احب شىْ ليا واحب لحظات احب اقضيها عارفين فين ؟؟؟؟؟؟؟؟؟
احب جدا امشى بالليل فى مكان فسيح انظر من حولى اجد الطبيعه القمر واقف فوقى بينورلى من غير مايكون له عداد نور يعد عليا خطواتى فى نورة ولا ضرايب ادفعها عليه وبينورلى زى مابينور للوزير والظابط والبيه اللى ماشيين زييى فى نفس اللحظه فى المهندسين او الزمالك او مارينا .
احب كمان امشى فى الصحرا واتلسع من نار الشمس كده واضحك فى نفسى وانا فرحان اقول لنفسى لما الشمس بتلسعنى كده امال اصحابك اللى باللى بالك اللى بيخشوا الحمام مكيف بارد وبيكيفوا الشعب تكييف سخن بس .. ياترى هيعملوا ايه فى لهيب جهنم وحرارتها
لك يوم ياظالم والله هو الواحد بيعانى طبعا بس التخيل ده بيشيل هم جامد من القلب والطبيعه هى الحاجه الوحيده اللى لسه مافسدتش ومااتباعتش ومااحتكرهاش حد تصوروا كده لو ربنا مش راضى عننا وعشنالنا فى البلد دى 25 زفت تانيين تبقى حادثه تصحى من النوم
تسحب نفس تلاقى نفسك مكروش مابيجيبش هوا وتسمع رساله رصيدك نفد ولازم تشحن خلال دقيقتين يابالسلامه مافيهاش فترة سماح دى
طب والله يعملوها وممكن يشفروا لنا الشمس تطلع تنور للى مشترك واللى مش مشترك يقضيها عتمه بقى .
هى دى بلدنا يااخوانا هو ده واقعنا المؤلم احنا اتبعنا واحنا قاعدين نجرى عشان نجيب فتات قوت يومنا نطلع من الصبح لاخر الليل عشان
نوفر لاسرتنا الستر واحنا فى الحقيقه فى غيبوبه عمركم سمعتم عن شعب كله فى غيبوبه وعنده زهايمرو75فى الميه منه تحت خط الفقر
وبيعانى كل امراض الدنيا سرطان وفشل كلوى وكبدى وملاريا وفلاريا وبلهارسيا وتيفود ودرن وحصبه المانى وايطالى وبلدى بنشجع السياحه بقى_ وانفلونزا الطيور وحمى الوادى للبقر ده غير الامراض بقى بتاعة الناس الاصحاء بتوع البلد اللى همه الصفوة زخيرة الوطن
الشباب والعنفوان عندهم حاجات بسيطه وشائعه زى امراض ضغط الدم والسكر وامراض العظام خد عندك بقى الشعب كله ضهرة بيوجعه
ورقابته ملووحه علطول والركب طبعا بايظه ...... المهم كل ده يهون الكارثه بقى ان الدوا متباع لشركات لا عندها ضمير انسانى ولا مهنى همها التربح الجشع ولو خدت دوا من مستشفيات الحكومه تبقى جدع وهتخلص نفسك سريع سريع من العذاب ده
اسعار الدواء بتتضاعف نار والعه ....ياعينى علينا والله شعب مظلوم بيتسرق وساكت مطحون ودخله معدوم وساكت مريض ومابيتعالجش
وصابر .... هات الاطلس وافتح خريطة العالم وطلعلى بلد بلاش جزيرة او عزبة فى العالم حاله يشبهنا والله ماهتلاقى البلاوى دى مجمعه
الا هنا فى هبة النيل حضارة 4الاف سنه قاهرة الغزاة قاهرة اهلها اللى بتتنهب ولسه عايشه وماشيه بتطلع عقول ورجال ...ياترى يا مصر ممكن تدب فيكى الحياة تانى ؟؟؟ انا شخصيا متاكد لانك عظيمه يامصر

الـثــورة الخـــالــــدة

2007-07-03T11:52:00.000-07:00

ثورة يوليو.. خمس وخمسون عامًا مضت على تفجرها ، ورغم ذلك فإن مبادئها لم تشخ ، بل كلما مر عام ، عادت ذكراها تجري في عروق الشباب جيلاً بعد جيل .
فثورة يوليو حلم لا يكاد يصدق أحد أنه تحقق يومًا على هذه الأرض ، ولا يصدق أحد أن هذا الشعب وجد من أعطاه حقوقه في يديه ..
لكنا خرجنا إلى الدنيا وجدنا هذه الحقوق سُلبت منا.. الثورة التي حررت الفرد قبل أن تحرر الأرض ، فإذا ربيت مواطنًا حرًا لا يقبل الذل والهوان ، فلا تخف على الأرض والوطن ، فالحر لن يسكن إلا حرة ، ولن يتنفس إلا عزة وكرامة.
هذا المصري وجد من ملّكه الأرض التي كان مسخّرًا فيها لخدمة الأجنبي ، المنتفع وحده بخيرها ، وحررت القنال الذي اختلطت مياهه بدماء الأجداد ، وشقت الطرق وأعلت الكباري وشيدت المصانع ، وشحذت الهمم والطاقات ، واستعانت بالعلم والتعليم ، ونادت بالوحدة العربية كخلاص من مشاكل الأمه ، وبَنَت السدالعالي معجزة القرن الذي لم نقدم جديدًا من بعده .
اهتمت الثورة بالفقراء ، فأقامت المستشفيات ، وسنّت القوانين التي تحفظ حقوق الفقراء ، وساوت بين الطبقات ، وألغت الألقاب . ورغم خوضها الحروب تلو الحروب والمعارك المتتالية ، واستهدافها من كل جانب ؛ خوفًا من إحداثها انفجارًا بالمنطقة كلها ، لكنها لم تخمد نارها أبدًا ، فالأفكار والمبادئ لا تموت.. مات الزعماء والقادة ، وظلت الفكرة في وجدان الشعب ، وصوت جمال يدوي في اْذان من لم يروه ومن لم يسمعوه .
نعم.. نسمعك اليوم ياجمال تنادينا : أيها الإخوة والأخوات.. 55 سنة على الثورة ، بس مش دي مصر اللي سبتها ، ومش ده شعبها ومش دوول أهلها.. كنا بننادي بالوحدة ، وعارفين إن الاستعمار مش هيسيبنا نحقق الوحدة .. الاستعمار وأعوانه ضربونا وهاجمونا في 56 ، وحطموا الوحدة مع سوريا ، وحاربونا في اليمن ، وتآمروا علينا في67 .. كل ده في 18 سنة أيها الإخوة والأخوات.. دلوقتي الاستعمار وصلنا لمرحلة إن احنا عايزين نوحد مصر نفسها ونصلحها من الداخل.. ننزع الكراهية والأحقاد اللي عملها الفساد ، وتفاوت الطبقات وانتشار الجريمة بشكل مفزع وقاسٍ ومتوحش ، والفساد الإداري والرشوة والاعتماد على المحسوبية وأهل الثقة ، وتواري دور العلم والمتعلمين وانهيار التعليم.
وتدهور صحة المواطنين ، واتساع شريحة الفقراء والمعدمين ، وتخلي الدولة عنهم ، وانتشار البطاله والنزوح من الوطن ، في نفس الوقت اللي بيزداد الاستثمار الأجنبي في الوطن.. عمرك شفت بلد طارد لأبنائه وجاذب للأجانب ؟ ! كل الدول يا طاردة يا جاذبة إنما الاتنين بالنقيض..
أرجع أيها الإخوة لصحة المواطن.. أنا مريت على مستشفى للكلى شعرت إن كل الوطن عنده فشل كلوي ، ونفس الشعور لما مريت بمستشفى السرطان ، ومستشفى الكبد .. أرقام المرضى بالملايين .
الناس لسه بتحكي عن هزيمة 67 ، ونسيوا إنجازات ماقبلها ، ونسيوا إن الجيش اللي انتصر في 73 هو الجيش اللي بنيناه بعد الهزيمة بقياداته وأسلحته وحوائط صواريخه.. أنا باقولهم إن الهزيمة في 67 أشرف بكتير من اللي أنا شايفكوا فيه دلوقتي.. إحنا اتهزمنا عشان ما ساومناش ومافرطناش في فلسطين ، وما رضيناش بسينا وضيعنا الوطن كله بمواطنيه ، وما دخلناش الأعداء بلدنا يلعبوا بمقدراتنا.. كلمتنا كانت واضحة ومؤثرة ، وكرامة الإنسان المصري كانت في السما من المحيط للخليج.. انهزمنا واستشهد 70 ألف من ولادنا ، لكن بنينا جيش تاني بسرعة قياسية لأننا كنا محافظين على مخزونا الحقيقي ، وهو صحة المواطن المصري.. النهاردة بننهزم كل يوم وأحيانًا أكتر من مرة.. هو عدم القدرة على الفعل مش هزيمة ؟ السلبية مش هزيمة ؟ التفريط في حاجات المواطنين الأساسية.. مش هزيمة ؟ زرع الشقاقات والكراهية بين أبناء الوطن.. مش هزيمة ؟ وعزله عن إخوانه العرب مش هزيمة ؟ انعدام أي دور لمصر ، وتأثير سياسي في المنطقة.. مش هزيمة ؟ الخوف من مجرد نقد الظلم من الأعداء.. مش هزيمة ؟ فلسطين ماحدش بيقدر يقول عليها محتلة والعراق احتل ومش قادرين نتكلم.. كل ده مش هزيمة ؟! لو كل دي مش هزايم يبقى احنا كنا منتصرين في 67.
وهنا انتهى صوت الزعيم الخالد ، وتوقفت كلماته التي تدوي في أسماعنا..
إنها الحقيقه يا ثورة يوليو.. أنتِ خالدة ، وكلما نزعنا ورقة من نتيجة الحائط زاد عمرك يومًا وزادت قيمتك ، وزاد
احتياجنا لكِ من جديد
ـــــــــــــــــــــــــــــــــــــ
أول مقال لى لاول عدد بعد انقطاع من مجلة علىّ صوتك
http://www.3allisotak.net/apages.php?pids=225&ids=do